Talooyin ku anfici kara

GACALO waxa aan kuu wadaa dhawr qodob oo ku anfici kara; 

1. Nolosha adduunku waxa ay noqotay mid maslaxad ku dhisan. Xiriirada badankoodu waxa ay noqdeen kuwa dan ku dhisan haddii ay yihiin kuwa saaxaabtinimo, kuwa jacayl iyo kuwa qoysba. La how wax dadku kuugu soo hirtaan, sidoo kalana adigu ku dooro dadka kale hadba waxa ay kugu kordhinayaan. 

2. Haddii aad ku jirta da’da qaan-gaadhnimada ama labaatanyeedaba waxa aad haysataa fursad wayn. Fursad ay fududahay in ay si fudud ku gu dhaafto adiga oo aan ka faa’iidaysan. Ka lahow nolosha qorshe cad, si’aadan hadhow u wareerin. Baro xirfad, kaa caawinaysa in aad nolosha horay ugu socoto.

3. Ka gudub xayn daabka maxay dadka kale iga aaminayaan. Anigaa kuu sheegaya, wax macno ah kuma fadhido waxa ay dadka kale kaa aamini doonaan. Cidina kuma xasuusnaan doonto, marna ha isaga dayn, qorshe aad lahayd, shaqo aad bilaabi lahayd ama qof aad dooran lahayd dadku sida ay kuu arki doonaan. 

4. Marna hadde waa marna ha ka baqin in aad hadalkaaga qeexdid, oo aad noqotid qof yaqaanna waxa uu rabo. Dadku way dareemaan shakiga iyo kalsooni darrada, daqiiqadda la dareemo in ay labo-labayn ku gu jirto cid walba ayaa kaa shakin doonta wayna adkaanaysaa in aad nolosha heer sare gaartid. 

5. Ugu dambayn, nolosha waxaa sida ay tahay ugu raaxaysta kuwa hadafka leh, kuwa yaqaanna meesha ay u socdaan, una samra caqabadaha hor taagan. Marna nolosha aad hadda ku jirtid yay kaa dhaadhicin in aadan wax wayn qaban karin. Waligaana ha ku tashan qof kale ee adigu samayso isha dhaqaalaha aad naftaada ku kaafin lahayd, inta ka horraysana dadaal kaasho.