QOF AAMUSAN JACAYLKII



QOF AAMUSAN JACAYLKII!

Ka sug hadalka habeen iyo maalin dabadeed seexo adiga oo aan jumlo ka helin. Hakaa daawado indhaha marwalba oo aad kulantaan isaga oo aan eray ku oran. Hakuu qoslo marwalba oo aad kaftan sheegto isaga oo aan xaraf kuugu baddalin.

Kaga hormar jacaylka oo u sheego, dabadeed eray kooban ha kuugu sheego inuu isba kuu ildaran yahay. Dabadeed noqo adigu cidda jacaylka hogaamisa. Ku wareer oo kala garan waa in uu weli ku jecel yahay iyo inkale. 

Ka farxi oo u furfur badaha sheekooyinka ah ee kuu kaydsan, dareen dabadeed in aad ku dawakhayso ag fadhiga qof aan kula fahmayn hadalka. Kumanaan jeer u sheeg in uusan kaa xishoon, in aad jeceshahay una baahantahay la sheekaysigiisa dabadeed ha kuugu laab qaboojiyo "Ag joogaygu miyuuna kugu filnayn gacalo?"

Dib isugu laabo oo adigu iska shaki, ka shaki war badnidaada iyo sababta aad adigu u hadal badan tahay. Naftaada kula dagaal sababta aad isaga oo kale u noqon la'dahay. Nac oo ka darug cid walba oo sheeko kuula timaadda. Dabadeed isla ag fariista jacayl aamusan, jacayl indhaha inta layska daawado ay ka badan tahay inta laysla hadlo.

Ku caajis oo u hilow dabcigaagii hore, xasuuso sida cid walbaa u jeclayd sheekadaada, soo labo kaclee oo dib u bilow ka cabashada aamuskiisa. Sidii oo kale ha kuugu jawaabo "Miyaad ku caajistay xiriirkayga?" Cod qeylo ah ku dheh "Haa weliba in badan." Isaga oo aan eray ku oran ha kaa dhaqaaqo, kadibna sidaa ku gal mawjado xanaaq iyo caro ah. Kala garan waa' in aad u xiistay iyo in aad ka xiistay. Dib u baar oo isku day in aad ku qanciso in uu kuu soo laabto. 

U tag isaga oo helay, qof aamusan, qof aan ka cabanayn aamuskiisa, ku faraxsan oo aan doonayn buuqa iyo madax wareerka kuwa hadalka badan ee aan ka caajisin in ay habeen iyo maalin sheekeeyaan. Kuwa rabitaanka badan u haya ogaanshaha wax cusub, kuwa daqiiqad aan u adkaysan karin meel aamusan oo bilaa hadal ah.

Ka daawo indhaha oo u khushuuc sida ay isugu qanceen, adiguna rajee in aad hesho qof kuu eg, qof aadan ka caajisayn, qof aadan u baahnayn in aad baddasho isaga, qof aadan ku khasbanayn in aad adigu dartiis dabcigiisa u qaadato.


Comments

Post a Comment

Popular posts from this blog

QORRAX MADOOBAAD

Image
Qorraxdii baa madoobaatay dhulkii baa mugdiyoobay. Qof walbaa waxa uu u cararay wixii uu aaminsanaa. Kii muslin ahaa, aayado quraan ah iyo salaad buu tawakulay. kii kiristan ahaana kaniisadda ayuu miciin biday. Hooyadii ilmaheeda dhallaanka ah dhabta ku haysatay waxa ay gargaar bidday duco ay afka ku boobtay. Wax walbaa waxa ay galeen xaalad hubanti la’aan ah marka la ga reebo xaalka Magan.  Waxa uu si qummaati ah u cabbayaa koobkiisa qaxwaha ah. Dadkii agagaarkiisa joogay waa ay kala cararayaan, isaga oo aan kala jeclayn in dunidu hadda dhammaato iyo in ay sii jirto ayuu xabbad sigaar ah jeebka kala soo baxayaa. “Tolow haddii hadda koonka la laabo ka warran?” Ayuu isa su’aalayaa. Isla isaga ayaa isu jawaabaya. “Oo maxaa iga dhex yaalla oo aan labadaydaas calal ee aan huwanahay ahayn?” “Miyaadan aakhiro ka baqayn, nin u shaqaystayna kuguma ogiye?” “Waxa aan ogahay in aysan xaalka aan maanta ku jiro marna ka xumaanayn.”  Sharqartii ayaa kala yaraatay, isaga iyo kursigii caagga ...
Read more

Awoodda filimada: iyo Sida ay u qaabeeyaan Bulshada.

Image
Filimadu waa sida muraayad oo kale, waxa ay ina tusaan xaqiiqooyin aad u xanuun badan, kuwaas oo laga yaabo in aan jeclaan lahayn in aan iska indho-tirno. Muuqaalkaan aan wada daawannay wuxuu xasuusin u yahay sida filimadu aysan kaliya u ahayn madadaalo, balse ay yihiin aalad xoog badan oo lagu muujiyo xanuunka taariikhda, lagu kiciyo dareenka bulshada, laguna hogaamiyo doodo qoto dheer. (Hotel Rwanda: The hutu arrive scene) Filimada aan daawanno ma ahan oo kaliya sheekooyin, ama madadaalo, waa aalad dib u qaabayn karta aragtideenna, waxay furi karaan indhahayaga, waxayna xitaa beddeli karaan sida aan u fahamno dunida nagu xeeran. Hotel Rwanda (2004): oo la sameeyay 10 sano kadib xasuuqii foosha xumaa ee Rwanda ka dhacay ayaa ah Markhaati Taariikheed oo cid walbaa dib u daalacan karto.  Filimkaan  waxa uu xambaarsan yahay xusuus kharaar oo taariikhda ah. Wuxuu dib noogu celinayaa xasuuqii Rwanda ee 1994, wuxuuna ina tusayaa sida hal qof – Paul Rusesabagina – uu u noqday badbaa...
Read more

Talooyin ku anfici kara

Image
GACALO waxa aan kuu wadaa dhawr qodob oo ku anfici kara;  1. Nolosha adduunku waxa ay noqotay mid maslaxad ku dhisan. Xiriirada badankoodu waxa ay noqdeen kuwa dan ku dhisan haddii ay yihiin kuwa saaxaabtinimo, kuwa jacayl iyo kuwa qoysba. La how wax dadku kuugu soo hirtaan, sidoo kalana adigu ku dooro dadka kale hadba waxa ay kugu kordhinayaan.  2. Haddii aad ku jirta da’da qaan-gaadhnimada ama labaatanyeedaba waxa aad haysataa fursad wayn. Fursad ay fududahay in ay si fudud ku gu dhaafto adiga oo aan ka faa’iidaysan. Ka lahow nolosha qorshe cad, si’aadan hadhow u wareerin. Baro xirfad, kaa caawinaysa in aad nolosha horay ugu socoto. 3. Ka gudub xayn daabka maxay dadka kale iga aaminayaan. Anigaa kuu sheegaya, wax macno ah kuma fadhido waxa ay dadka kale kaa aamini doonaan. Cidina kuma xasuusnaan doonto, marna ha isaga dayn, qorshe aad lahayd, shaqo aad bilaabi lahayd ama qof aad dooran lahayd dadku sida ay kuu arki doonaan.  4. Marna hadde waa marna ha ka baqin in aad h...
Read more